અજય સાલ્વી પર 15થી વધુ ઘા ઝીંકાયા હોવાની પ્રાથમિક માહિતી; અગાઉની બબાલ બાદ જાનથી મારી નાખવાની ધમકી મળી હોવાનો દાવો

અમદાવાદ: અમદાવાદ શહેરના રાણીપ વિસ્તારમાં આવેલા સુભાષબ્રિજ ખાતે ગત રાત્રે આશરે 2 વાગ્યાના સુમારે યુવકની હત્યાની ઘટના સામે આવી છે. રોયલ મિલના છાપરા પાસે રહેતા અજય સાલ્વી નામના યુવક પર ટેમ્પોમાં આવેલા આશરે 10 જેટલા હુમલાખોરોએ તીક્ષ્ણ હથિયારો વડે હુમલો કર્યો હોવાની પ્રાથમિક માહિતી છે. ગંભીર રીતે ઘવાયેલા અજય સાલ્વીનું ઘટનાસ્થળે જ મોત નીપજ્યું હોવાનું જાણવા મળ્યું છે.

ત્રણ દિવસ અગાઉ બબાલ થઈ હોવાની માહિતી

પ્રાથમિક માહિતી અનુસાર, ત્રણ દિવસ અગાઉ સુભાષબ્રિજ ખાતે અજય સાલ્વી અને અંકિત નામના યુવક સહિત અન્ય એક યુવક વચ્ચે બબાલ થઈ હતી. આ દરમિયાન અજય સાલ્વીને જાનથી મારી નાખવાની ધમકી આપવામાં આવી હોવાનો દાવો કરવામાં આવ્યો છે.

જીવ બચાવવા ભાગેલા યુવક પર હુમલો

ગત રાત્રે અજય સાલ્વી સુભાષબ્રિજ પાસે ચા પીવા માટે ઊભો હતો ત્યારે આરોપીઓ ટેમ્પો લઈને ત્યાં પહોંચ્યા હોવાની માહિતી છે. હુમલાખોરોને હથિયારો સાથે જોઈને અજય સાલ્વી ત્યાંથી ભાગ્યો હતો. જોકે, સુભાષબ્રિજ સર્કલ પાસે તે નીચે પડી જતાં હુમલાખોરોએ તેને ઘેરી લીધો હોવાનો આક્ષેપ છે.

આ દરમિયાન તલવાર અને છરી જેવા તીક્ષ્ણ હથિયારો વડે તેના શરીર પર 15થી વધુ ઘા કરવામાં આવ્યા હોવાની પ્રાથમિક માહિતી સામે આવી છે. હુમલામાં યુવકને ગંભીર ઈજાઓ પહોંચી હતી અને તેનું ઘટનાસ્થળે જ મોત નીપજ્યું હોવાનું જાણવા મળ્યું છે.

રાણીપ પોલીસ ચોકી સામે જ બનાવ બનતા પોલીસ દોડી આવી

ઘટના રાણીપ પોલીસ ચોકીની સામેના વિસ્તારમાં બની હોવાથી બનાવની જાણ થતાં રાણીપ પોલીસ તથા ક્રાઈમ બ્રાન્ચનો કાફલો ઘટનાસ્થળે પહોંચ્યો હતો. પોલીસે મૃતદેહને પોસ્ટમોર્ટમ માટે મોકલી આપ્યો હતો.

પ્રાથમિક માહિતી મુજબ સમગ્ર મામલે અંકિત તથા તેના સાથીદારો સામે કાયદેસરની કાર્યવાહી હાથ ધરવામાં આવી છે અને તેમની ધરપકડ માટે પોલીસે તપાસ શરૂ કરી છે.

મૃતક સામે અગાઉના ગુનાઓ નોંધાયેલા હોવાની માહિતી

મળતી માહિતી મુજબ, મૃતક અજય સાલ્વી સામે સાબરમતી અને રાણીપ સહિતના વિવિધ પોલીસ સ્ટેશનોમાં અગાઉ પ્રોહિબિશન સંબંધિત ગુનાઓ નોંધાયેલા હતા.

હાલ સમગ્ર ઘટનાની પોલીસ દ્વારા તપાસ ચાલી રહી છે. હત્યા પાછળનું ચોક્કસ કારણ, હુમલામાં સંડોવાયેલા તમામ વ્યક્તિઓની ભૂમિકા અને ઘટનાક્રમ અંગેની વધુ વિગતો પોલીસ તપાસ બાદ સ્પષ્ટ થશે.

નોંધ: ઉપરોક્ત વિગતો પ્રાથમિક માહિતીના આધારે રજૂ કરવામાં આવી છે. આરોપીઓ સામેના આક્ષેપો અંગે અંતિમ નિર્ણય સક્ષમ અદાલત દ્વારા પુરાવા અને કાયદાકીય પ્રક્રિયા આધારે લેવામાં આવશે.